நீங்கள் மரணமடையும் வரை சொர்க்கத்தில் நுழைய முடியாது

 

“நிம்மதியடைந்த ஆன்மாவே! நீ உன் இறைவனிடம் திருப்தியடைந்தவாறும், அவன் (உன்னிடம்) திருப்தியடைந்தவாறும் (அவனிடம்) திரும்பி வருக9. தேர்ந்தெடுக்கப்பட்ட என் அடியார்களுக்கிடையே நுழைந்து விடுக10. (என உன் இறைவன் உன்னிடம் கூறுகின்றான்). மேலும் நீ என் தோட்டத்தில் நுழைந்து விடுக..”

— அல்குர்ஆன், அத்தியாயம் 89, வசனங்கள் 28–31

இந்த அழகிய ஆதாரத்திற்கான விளக்கத்தை வாக்களிக்கப்பட்ட மஸீஹ் (அலை) அவர்களே வழங்குவதைப் பார்ப்போம்:

“ஒரு மனிதர் மரணத்தை அனுபவிக்கும் வரை, இவ்வுலக வாழ்க்கையை விட்டு அகன்றவர்களின் கூட்டத்தில் அவர் சேர முடியாது என்பது இந்த வசனத்திலிருந்து மிகவும் தெளிவாகிறது. மேலும், ஸஹீஹ் அல்-புகாரியில் இடம்பெற்றுள்ள மிஃராஜ் (விண்ணேற்றம்) தொடர்பான விரிவான ஹதீஸ், மர்யமின் மகனான மஸீஹ், முன்னர் வந்த நபிமார்களின் கூட்டத்தில் இருந்தார் என்ற உண்மையை உறுதிப்படுத்துகிறது. எனவே, இந்தத் தீர்க்கமானதும் தெளிவானதுமான ஆதாரத்தின் முன்னிலையில், மர்யமின் மகனான மஸீஹ் மரணமடைந்துவிட்டார் என்பதை ஏற்றுக்கொள்வதைத் தவிர நமக்கு வேறு வழியில்லை. நாம் திருக்குர்ஆனில் நம்பிக்கை கொள்கிறோம்; அதற்கு முரண்படுகின்ற அனைத்தையும் நிராகரிக்கிறோம்.”

— இஸாலா-ஏ-அவ்ஹாம், ஈசா (அலை) அவர்களின் மரணத்திற்கான 23-வது வசனத்தின் கீழ்

மிஃராஜ் தொடர்பான ஹதீஸ்

மாலிக் பின் ஸஅ்ஸஅ (ரலி) அவர்கள் அறிவிக்கிறார்கள்:

நபி (ﷺ) அவர்கள் தமது விண்ணேற்ற இரவு குறித்து மக்களிடம் கூறினார்கள்:

“பின்னர் (ஜிப்ரீல்) என்னை அழைத்துக்கொண்டு மேலே சென்றார். இரண்டாவது வானத்தை அடைந்தபோது, அதன் வாயில் திறக்கப்படுமாறு கேட்டார். ‘யார் அது?’ என்று கேட்கப்பட்டது. அதற்கு அவர், ‘நான் ஜிப்ரீல்’ என்று பதிலளித்தார். ‘உங்களுடன் இருப்பவர் யார்?’ என்று கேட்கப்பட்டது. அதற்கு அவர், ‘முஹம்மது’ என்றார். ‘அவர் அழைக்கப்பட்டிருக்கிறாரா?’ என்று கேட்கப்பட்டது. அதற்கு அவர், ‘ஆம்’ என்றார். நாங்கள் இரண்டாவது வானத்தை அடைந்தபோது, அங்கே யஹ்யாவையும் ஈசாவையும் கண்டேன். அவர்கள் இருவரும் தாய்வழி உறவினர்கள் (மாமன் மகன்கள்) ஆவர். ஜிப்ரீல், ‘இவர்கள் யஹ்யாவும் ஈசாவும் ஆவர். இவர்களுக்கு ஸலாம் கூறுங்கள்’ என்றார். நான் அவர்களுக்கு ஸலாம் கூறினேன். அவர்கள் எனது ஸலாமுக்குப் பதிலளித்து, ‘வருக, நல்ல சகோதரரே! வருக, நல்ல நபியே!’ என்று கூறினார்கள்.”

— ஸஹீஹ் அல்-புகாரி, தொகுதி 4, புத்தகம் 55, ஹதீஸ் 640

நன்றி: AhmadiAnswers