அஹ்மதிய்யா கிலாஃபத்

இஸ்லாத்தில் நபித்துவத்திற்குப் பிறகு மிக முக்கியமான ஆன்மிக அமைப்பாக கிலாஃபத் கருதப்படுகிறது. கிலாஃபத் என்பது நபித்துவத்தின் ஆன்மிக வாரிசுத் தலைமை என்பதாகும். இஸ்லாமியக் கண்ணோட்டத்தில், கலீஃபாக்கள் இறைவனின் வழிகாட்டுதலின் மூலம் இறுதியில் இறைவனால் நியமிக்கப்படுகிறார்கள்.

ஒரு காலகட்டத்தில் கிலாஃபத் மறைந்துபோன போதிலும், ஹஸ்ரத் நபி (ஸல்லல்லாஹு அலைஹி வஸல்லம்) அவர்களால் முன்னறிவிக்கப்பட்டதன் அடிப்படையில் அது மீண்டும் நிலைநாட்டப்படும் என்ற நம்பிக்கை அஹ்மதிய்யா முஸ்லிம் ஜமாஅத்தின் முக்கிய நம்பிக்கைகளில் ஒன்றாகும்.

திருக்குர்ஆனில் கிலாஃபத்

கிலாஃபத் பற்றிய இறைவனின் வாக்குறுதி புனித குர்ஆனில் காணப்படுகிறது:

“அல்லாஹ் உங்களுள் நம்பிக்கை கொண்டு நற்செயலாற்றுபவர்களை, அவர்களின் முன்னோர்களை கலீஃபாவாக (தலைவராக) ஆக்கியது போன்று இப்பூமியில் கலீஃபாவாக ஆக்குவதாக அல்லாஹ் வாக்களித்துள்ளான்...” (24:56)

இந்த வசனம், ஈமான் மற்றும் நற்செயல்களைக் கொண்டவர்களுக்கு இறைவன் அளிக்கும் கிலாஃபத் தொடர்பான வாக்குறுதியை எடுத்துரைக்கிறது.

ஹதீஸில் கிலாஃபத்

கிலாஃபத் குறித்து ஹஸ்ரத் நபி (ஸல்) அவர்கள் முன்னறிவித்ததாகக் கூறப்படும் ஹதீஸிலும் குறிப்பிடப்பட்டுள்ளது:

“உங்களில் நபித்துவம் அல்லாஹ் நாடிய காலம் வரை நிலைத்திருக்கும். பின்னர், அதை அல்லாஹ் முடிவுக்குக் கொண்டுவருவான். அதன் பின்னர், நபித்துவத்தின் வழிமுறையைப் பின்பற்றிய கிலாஃபத்தை அல்லாஹ் நாடிய காலம் வரை ஏற்படுத்துவான். பின்னர், அதையும் முடிவுக்குக் கொண்டுவருவான். அதன்பின்னர், கொடுங்கோன்மையான முடியாட்சி ஏற்படும்; அது அல்லாஹ் நாடிய காலம் வரை நீடித்து, பின்னர் முடிவுக்கு வரும். அதன்பிறகு, முடியாட்சி சார்ந்த எதேச்சதிகாரம் தோன்றும்; அது அல்லாஹ் நாடிய காலம் வரை நீடித்து, பின்னர் அவருடைய கட்டளையின்படி முடிவுக்கு வரும். அதன் பின்னர், மீண்டும் நபித்துவத்தின் வழிமுறையைப் பின்பற்றிய கிலாஃபத் தோன்றும்.”

புனித நபி (ஸல்லல்லாஹு அலைஹி வஸல்லம்) அவர்கள் இதற்குப் பிறகு வேறெதுவும் கூறவில்லை." (முஸ்னத் அஹ்மத்)

இதன் அடிப்படையில், நபித்துவத்திற்குப் பின்னர் இறைவழிகாட்டுதலின் கீழ் கிலாஃபத் ஏற்படும் என்று நம்பப்படுகிறது.

கிலாஃபத்-இ-ராஷிதா

ஹஸ்ரத் நபி (ஸல்) அவர்களின் மறைவுக்குப் பின்னர் அவர்களின் முதல் நான்கு கலீஃபாவாக பொறுப்பேற்ற ஹஸ்ரத் அபூபக்கர் (ரலி), ஹஸ்ரத் உமர் (ரலி), ஹஸ்ரத் உஸ்மான் (ரலி), ஹஸ்ரத் அலி (ரலி) ஆகியோர் கிலாஃபத்-இ-ராஷிதா என அழைக்கப்படுகின்றனர்.

ஹஸ்ரத் அபூபக்கர் (ரலி)

இரண்டு ஆண்டுகளுக்கும் சற்றே அதிகமான காலம் நீடித்த அவர்களின் கிலாஃபத், ஹஸ்ரத் நபி (ஸல்) அவர்களின் மறைவுக்குப் பின்னர் முஸ்லிம்களின் ஒற்றுமையைப் பாதுகாப்பதில் முக்கியப் பங்கு வகித்தது.

ஹஸ்ரத் உமர் (ரலி)

கலீஃபாவுக்கு ஆலோசனை வழங்கும் ஆலோசனைக் குழுவை உருவாக்கியதோடு, இஸ்லாமிய அரசை பல மாகாணங்களாகப் பிரித்து, திறமையான நிர்வாக மற்றும் ஆட்சிமுறையையும் ஏற்படுத்தினார்.

ஹஸ்ரத் உஸ்மான் (ரலி)

கலீஃபாவாக இருந்த காலத்தில், திருக்குர்ஆனின் பிரதிகளை முஸ்லிம் உலகெங்கும் மீண்டும் தயாரித்து விநியோகிக்கும் பணியை மேற்பார்வையிட்டார். மேலும், தனது தனிப்பட்ட செல்வத்தின் பெரும் பகுதியையும் சமூக நலனுக்காகச் செலவிட்டார்.

ஹஸ்ரத் அலி (ரலி)

ஹஸ்ரத் நபி (ஸல்) அவர்களின் உறவினரும் மருமகனுமான ஹஸ்ரத் அலி (ரலி), ஹஸ்ரத் உஸ்மான் (ரலி) அவர்களின் படுகொலைக்குப் பின்னர் முஸ்லிம்களிடையே அமைதியை ஏற்படுத்துவதற்கு முயன்றார்.

அஹ்மதிய்யா கிலாஃபத்

வாக்களிக்கப்பட்ட மஸீஹ் ஹஸ்ரத் மிர்ஸா குலாம் அஹ்மத் (அலைஹிஸ்ஸலாம்) அவர்களின் மறைவுக்குப் பின்னர் அவர்களின் வாரிசுகளாகப் பொறுப்பேற்ற கலீஃபாக்களின் தலைமையே அஹ்மதிய்யா கிலாஃபத் என அழைக்கப்படுகிறது.

ஹஸ்ரத் ஹகீம் நூருத்தீன் (ரலி)

வாக்களிக்கப்பட்ட மஸீஹ் (அலை) அவர்களின் மறைவுக்குப் பின்னர், ஹஸ்ரத் அபூபக்கர் (ரலி) அவர்களைப் போலவே, ஹஸ்ரத் ஹகீம் நூருத்தீன் (ரலி) அவர்கள் அஹ்மதிய்யா முஸ்லிம் ஜமாஅத்த்தின் ஒற்றுமையை நிலைநாட்டினார்கள்.

ஹஸ்ரத் மிர்ஸா பஷீருத்தீன் மஹ்மூத் அஹ்மத் (ரலி)

“வாக்களிக்கப்பட்ட சீர்திருத்தவாதி” எனவும் அழைக்கப்படும் ஹஸ்ரத் மிர்ஸா பஷீருத்தீன் மஹ்மூத் அஹ்மத் (ரலி) அவர்கள், அஹ்மதிய்யா முஸ்லிம் ஜமாஅத்தின் நிர்வாகத்தில் பல முக்கியமான முன்னேற்றங்களை அறிமுகப்படுத்தினார்கள்.

ஹஸ்ரத் மிர்ஸா நாசிர் அஹ்மத் (ரஹ்)

கலீஃபாவாக இருந்த காலத்தில், பாகிஸ்தான் அஹ்மதிய்யா ஜமாஅத்தை முஸ்லிமல்லாத ஜமாஅத்தாக அறிவித்தபோது, அவர் ஜமாஅத்திற்கு சிறந்த தலைமைத்துவத்தையும் வழிகாட்டுதலையும் வழங்கினார்கள்.

ஹஸ்ரத் மிர்ஸா தாஹிர் அஹ்மத் (ரஹ்)

பல குறிப்பிடத்தக்க பணிகளை மேற்கொண்டதோடு, முதல் முஸ்லிம் செயற்கைக்கோள் தொலைக்காட்சி வலையமைப்பைத் தொடங்கினார்கள். இதுவே பின்னர் உலகளவில் அஹ்மதிய்யா முஸ்லிம் ஜமாஅத்தின் செய்தி மற்றும் இஸ்லாமிய போதனைகளைப் பரப்புவதில் முக்கியப் பங்கு வகித்தது.

ஹஸ்ரத் மிர்ஸா மஸ்ரூர் அஹ்மத் (அய்யதஹுல்லாஹ்..)

தற்போதைய கலீஃபாவாகிய ஹஸ்ரத் மிர்ஸா மஸ்ரூர் அஹ்மத் (அய்யதஹுல்லாஹ்..) அவர்கள், இஸ்லாத்திற்கு எதிரான உலகளாவிய சந்தேகங்களும் எதிர்ப்புகளும் அதிகமாகக் காணப்படும் காலகட்டத்தில் அஹ்மதிய்யா முஸ்லிம் ஜமாஅத்திற்கு ஆன்மிக வழிகாட்டுதலை வழங்கி வருகிறார்கள்.

கிலாஃபத்தின் நோக்கம்

அஹ்மதிய்யா முஸ்லிம் ஜமாஅத்தின் கண்ணோட்டத்தில், கிலாஃபத் என்பது வெறுமனே ஒரு நிர்வாகத் தலைமை அமைப்பு அல்ல. அது இறைவனின் வழிகாட்டுதலின் கீழ் ஜமாஅத்தை ஆன்மிக ரீதியாக வழிநடத்தும் அமைப்பாகும்.

நபித்துவத்தின் காலம் நிறைவடைந்த பின்னரும், இறைவனின் ஆன்மிக வழிகாட்டுதல் மனிதகுலத்தை விட்டு நீங்கிவிடவில்லை என்பதையும், நம்பிக்கையாளர்களை ஒன்றிணைத்து அவர்களின் ஆன்மிக முன்னேற்றத்திற்கு வழிகாட்டும் ஓர் அமைப்பை இறைவன் ஏற்படுத்துவான் என்பதையும் கிலாஃபத் எடுத்துக்காட்டுவதாக அஹ்மதிய்யா முஸ்லிம் ஜமாஅத் நம்புகிறது.

இதனால், கிலாஃபத் என்பது ஆன்மிக ஒற்றுமை, இறைவழிகாட்டுதல், நம்பிக்கையாளர்களின் ஒன்றுபட்ட நிலை மற்றும் இஸ்லாத்தின் போதனைகளை உலகில் நிலைநாட்டுதல் ஆகியவற்றுடன் தொடர்புடையதாகக் கருதப்படுகிறது.