யார் இந்த அஹ்மதிகள்!

 

அஹ்மதிய்யா முஸ்லிம் ஜமாஅத் என்பது, காதியானைச் சேர்ந்த ஹஸ்ரத் மிர்ஸா குலாம் அஹ்மத் (அலை) (1835–1908) அவர்களை வாக்களிக்கப்பட்ட மசீஹ் மற்றும் இமாம் மஹ்தி என்று நம்புகின்ற முஸ்லிம்களின் உலகளாவிய ஜமாஅத்தாகும்.

ஹஸ்ரத் மிர்ஸா குலாம் அஹ்மத் (அலை) அவர்கள் 1889 ஆம் ஆண்டு, இஸ்லாத்திற்குள் ஒரு மறுமலர்ச்சி இயக்கமாக அஹ்மதிய்யா முஸ்லிம் ஜமாஅத்தை நிறுவினார்கள். இஸ்லாத்தின் அடிப்படைப் போதனைகளான அமைதி, அன்பு, நீதி மற்றும் மனித உயிரின் புனிதத்துவம் ஆகியவற்றை மீண்டும் நிலைநாட்டுவதே அந்த இயக்கத்தின் நோக்கமாக இருந்தது.

இன்று, அல்லாஹ்வால் நியமிக்கப்பட்ட ஒரே ஆன்மிகத் தலைவரான ஐந்தாம் கலீஃபத்துல் மசீஹ் ஹஸ்ரத் மிர்ஸா மஸ்ரூர் அஹ்மத் (அய்யதஹுல்லாஹு தஆலா பினஸ்ரிஹில் அஸீஸ்) (பி. 1950) அவர்களின் தலைமையின் கீழ் இயங்கும் உலகின் மிகப்பெரிய ஒற்றுமைமிக்க இஸ்லாமிய ஜமாஅத் அஹ்மதிய்யா முஸ்லிம் ஜமாஅத்தாகும். இவ்வியக்கம் உலகின் 200-க்கும் மேற்பட்ட நாடுகளில் பரவி, பல கோடி உறுப்பினர்களைக் கொண்டுள்ளது.

ஹஸ்ரத் மிர்ஸா குலாம் அஹ்மத் (அலை) அவர்கள், ஹஸ்ரத் நபிகள் நாயகம் ஹஸ்ரத் முஹம்மத் (ஸல்) அவர்கள் முன்னறிவித்தபடி, ஈஸா (அலை) அவர்களின் உருவக மறுவருகையும் வாக்களிக்கப்பட்ட இமாம் மஹ்தியும்தான் தாமே என்று அறிவித்தார்கள்.

அல்லாஹ் தஆலா, மதத்தின் பெயரால் நடைபெறும் போர்களுக்கு முற்றுப்புள்ளி வைக்கவும், இரத்தப்பாய்ச்சலைக் கண்டிக்கவும், ஒழுக்கம், நீதி மற்றும் அமைதியை உலகில் மீண்டும் நிலைநாட்டவும் ஹஸ்ரத் மிர்ஸா குலாம் அஹ்மத் (அலை) அவர்களை அனுப்பினான் என்று அஹ்மதிய்யா முஸ்லிம் ஜமாஅத் நம்புகிறது.

அவர், தீவிரவாதக் கருத்துக்களாலும் தவறான மதப் பழக்கவழக்கங்களாலும் பாதிக்கப்பட்டிருந்த முஸ்லிம்களை, இஸ்லாத்தின் உண்மையான போதனைகளின் பக்கம் உறுதியாக அழைத்தார். அதேவேளையில், ஜரதுஷ்டிரர், இப்ராஹீம் (அலை), மூசா (அலை), ஈஸா (அலை), கிருஷ்ணர், புத்தர், கன்பூஷியஸ், லாவோ ட்ஸு மற்றும் குரு நானக் உள்ளிட்ட உலகின் மகத்தான மத நிறுவனர்களும் ஞானிகளும் போதித்த உயரிய உண்மைகளை மதித்து ஏற்றுக்கொண்டார். அவர்களின் அசல் போதனைகள் அனைத்தும் இறுதியில் இஸ்லாத்தின் உண்மைப் போதனைகளோடு ஒன்றிணைகின்றன என்பதை விளக்கினார்.

அஹ்மதிய்யா முஸ்லிம் ஜமாஅத், பயங்கரவாதத்தை எந்தவித தயக்கமுமின்றி முழுமையாக நிராகரிக்கும் முன்னணி இஸ்லாமிய அமைப்பாகும். நூற்றாண்டுக்கும் மேலாக முன்பே, ஹஸ்ரத் மிர்ஸா குலாம் அஹ்மத் (அலை) அவர்கள், "வாளால் செய்யப்படும் ஜிஹாத்" இஸ்லாத்தில் இனி இடமில்லை என்று ஆணித்தரமாக அறிவித்தார்கள்.

அதற்கு பதிலாக, திருக்குர்ஆனையும் ஹஸ்ரத் நபிகள் நாயகம் (ஸல்) அவர்களின் முன்மாதிரியையும் பின்பற்றி, இரத்தம் சிந்தாத "பேனாவின் ஜிஹாத்" (அறிவுசார் ஜிஹாத்) மூலம் இஸ்லாத்தைப் பாதுகாக்க வேண்டும் என்று முஸ்லிம்களுக்கு போதித்தார்கள்.

அதன்படி, அவர் 80-க்கும் மேற்பட்ட நூல்களை எழுதியதோடு, பல்லாயிரக்கணக்கான கடிதங்களை எழுதினார்; நூற்றுக்கணக்கான சொற்பொழிவுகளை நிகழ்த்தினார்; எண்ணற்ற பொது விவாதங்களில் கலந்துகொண்டார். இன்று வரை அஹ்மதிய்யா முஸ்லிம் ஜமாஅத், கல்வி மற்றும் அறிவுப்பூர்வமான அழைப்பின் மூலம் முஸ்லிம்களை அமைதியான வழியில் சீர்திருத்தி, உலகம் முழுவதும் இஸ்லாத்தின் உண்மையான போதனைகளைப் பரப்பி வருகிறது.

ஹஸ்ரத் மிர்ஸா குலாம் அஹ்மத் (அலை) அவர்கள், நபித்துவத்திற்குப் பின் கிலாஃபத் என்ற ஆன்மிக வாரிசுத்துவ அமைப்பின் மூலம் இஸ்லாத்தைப் பாதுகாப்பதாக அல்லாஹ் அளித்த வாக்குறுதியை முஸ்லிம்களுக்கு நினைவூட்டினார்கள். மனிதகுலத்தை அமைதியான முறையில் ஒன்றிணைக்கக்கூடியது உண்மையான இஸ்லாமிய கிலாஃபத் அமைப்பே என்று அஹ்மதிய்யா முஸ்லிம் ஜமாஅத் நம்புகிறது.

ஹஸ்ரத் மிர்ஸா குலாம் அஹ்மத் (அலை) அவர்கள் மறைந்த பின்னர், ஐந்து கலீஃபாக்கள் அவர்களின் வாரிசுகளாகப் பொறுப்பேற்றுள்ளனர்.

தற்போதைய கலீஃபாவான ஹஸ்ரத் மிர்ஸா மஸ்ரூர் அஹ்மத் (அய்யதஹுல்லாஹு தஆலா பினஸ்ரிஹில் அஸீஸ்) அவர்கள், ஐக்கிய இராச்சியத்தில் (United Kingdom) வசித்து வருகிறார். அவர் ஜமாஅத்தின் ஆன்மிக மற்றும் நிர்வாகத் தலைவராக பணியாற்றி வருகிறார்.

கிலாஃபத்தின் தலைமையின் கீழ், அஹ்மதிய்யா முஸ்லிம் ஜமாஅத் உலகம் முழுவதும் 16,000-க்கும் மேற்பட்ட பள்ளிவாசல்கள், 600 கல்வி நிறுவனங்கள் மற்றும் 30 மருத்துவமனைகளை நிறுவியுள்ளது. மேலும், திருக்குர்ஆன் 70-க்கும் மேற்பட்ட மொழிகளில் மொழிபெயர்க்கப்பட்டுள்ளது.

அமைதி, சகிப்புத்தன்மை மற்றும் மனிதநேயத்தை வலியுறுத்தும் இஸ்லாத்தின் உண்மையான போதனைகள், MTA (Muslim Television Ahmadiyya) என்ற 24 மணி நேர செயற்கைக்கோள் தொலைக்காட்சி, Alislam.org இணையதளம் மற்றும் Islam International Publications வெளியீடுகள் மூலமாக உலகம் முழுவதும் பரப்பப்பட்டு வருகின்றன.

மேலும், Humanity First என்ற இலாபநோக்கற்ற மனிதநேய அமைப்பின் மூலம், உலகெங்கிலும் பேரிடர் நிவாரணம் மற்றும் மனிதாபிமான உதவிகளில் ஜமாஅத் முன்னணியில் செயல்பட்டு வருகிறது.

அஹ்மதிய்யா முஸ்லிம் ஜமாஅத், மத அமைப்பும் அரசும் தனித்தனியாக இயங்க வேண்டும் என்ற கொள்கையைத் தெளிவாக ஆதரிக்கும் ஒரே இஸ்லாமிய அமைப்பாகும்.

பல முஸ்லிம் பெரும்பான்மை நாடுகளில் கடுமையான மத அடிப்படையிலான துன்புறுத்தல்களை எதிர்கொண்ட போதிலும், அஹ்மதிய்யா முஸ்லிம் ஜமாஅத், அனைத்து மதத்தினருக்கும் மற்றும் ஒடுக்கப்படும் சிறுபான்மையினருக்கும் சமமான மனித உரிமைகள் வழங்கப்பட வேண்டும் என்று தொடர்ந்து வலியுறுத்தி வருகிறது.

அதேபோல், பெண்களின் சமத்துவம், கல்வி மற்றும் அதிகாரமளித்தல் ஆகிய துறைகளிலும் பெருமளவில் முதலீடு செய்து செயல்பட்டு வருகிறது. உலகளவில், அஹ்மதிய்யா முஸ்லிம் ஜமாஅத் உறுப்பினர்கள் சட்டத்தை மதிக்கும், கல்வியறிவு மிக்க மற்றும் சமூகப் பொறுப்புணர்வுடன் வாழும் முஸ்லிம்களாகப் பரவலாக அறியப்படுகின்றனர்.

நன்றி: alislam.org