This week with Huzoor (19 ஜூன் 2026) என்ற நிகழ்ச்சியில் ஹுஸூர் அன்வர் (அய்யதஹுல்லாஹ்..) அவர்கள் அமெரிக்காவின் லாஸ் ஏஞ்சல்ஸ் மற்றும் பால்டிமோர் ஆகிய இடங்களிலிருந்து வந்த அன்ஸார் மற்றும் ஆமிலா உறுப்பினர்களின் கேள்விகளுக்கு அளித்த பதில்களின் சுருக்கம்:
ஆன்மிக மற்றும் உலகியல் காரியங்களில் வெற்றி பெறுவதற்கான வழிமுறையை எங்களுக்குக் கூறுங்கள். (01:26)
வெற்றிக்கான அடிப்படை ஐந்து வேளைத் தொழுகைகளை ஆழ்ந்த கவனத்துடன் பேணுவதாகும்; ஏனெனில், தொழுகை என்பது மனித வாழ்க்கையை ஒழுங்குபடுத்த அல்லாஹ் வழங்கிய அருட்கொடையாகும். அனைத்துக் காரியங்களிலும் இறைவனிடம் உதவி கோரி, அவனது கட்டளைகளின்படி செயல்படும்போதுதான் பிரார்த்தனைகள் அங்கீகரிக்கப்படுகின்றன. அதேசமயம், தொழுகையை மட்டும் நிறைவேற்றுவது போதாது; அல்லாஹ்வுக்கான உரிமைகளை (ஹுகூகுல்லாஹ்) நிறைவேற்றுவதுடன், சக மனிதர்களுக்கான கடமைகளையும் (ஹுகூகுல் இபாத்) முறையாகச் செய்ய வேண்டும். ஆன்மிக முன்னேற்றத்திற்கு எளிய குறுக்குவழிகள் ஏதுமில்லை; உலகியல் துறைகளில் வெற்றி பெற எப்படித் தொடர்ச்சியான கல்வியும் கடின உழைப்பும் அவசியமோ, அதேபோல ஆன்மிக வாழ்விலும் தொடர்ச்சியான முயற்சியும் அர்ப்பணிப்பும் இன்றியமையாதவையாகும்.
சமூகத்திலிருந்து தனிமைப்படுத்தப்படாமல், அதே வேளையில் நமது இஸ்லாமிய விழுமியங்களை எவ்வாறு பேணிக்காக்கலாம்? (02:38)
சுயநலமும் தனிமனிதவாதமும் தனது உரிமைகளை மட்டும் முன்னிறுத்தி மற்றவர்களின் உரிமைகளைப் புறக்கணிக்கும் நிலையை உருவாக்குவதோடு, மனிதன் இறைவனிடமிருந்து தூரமாகும்போதே இத்தகைய சுயநலம் பிறக்கிறது. எனவே, ஒரு உண்மையான அஹ்மதி முஸ்லிம் அல்லாஹ் வழங்கியுள்ள 'ஹுகூகுல்லாஹ்' (இறைவனின் உரிமைகள்), 'ஹுகூகுல் இபாத்' (படைப்பினங்களின் உரிமைகள்) ஆகிய இரண்டு கடமைகளையும் சமநிலையில் பேண வேண்டும்; தீனை உலக காரியங்களை விட முன்னிலைப்படுத்தும்போது பிறருக்கு உதவும் பண்பு இயல்பாகவே உருவாகும். உலகளாவிய ஆய்வுகளின்படி, அதிக ஈடுபாடுள்ள இறை நம்பிக்கையாளர்களே தர்மம் செய்வதில் முன்னணியில் இருப்பதால், அஹ்மதியர்கள் இந்த நற்பண்பைத் தங்களது அடுத்த தலைமுறைக்குக் கொண்டு செல்ல வேண்டும். நாம் வெறும் சொற்பொழிவுகளைக் கேட்பதுடன் நின்றுவிடாமல், தொழுகையுடன் சமூகத்தில் தேவையில் இருப்பவர்களுக்கு உதவி செய்வதையும் வழக்கமாக்கிக் கொண்டு, இந்தச் சிந்தனையை நமது பிள்ளைகளிடம் வளர்ப்பதன் மூலம் இஸ்லாமிய அடையாளத்தை இழக்காமல் சமூகத்தில் சிறந்த நபர்களாக வாழ முடியும்.
'வசிய்யத்' (Wasiyyat) எனும் அமைப்பின் வளர்ச்சியை நீங்கள் எவ்வாறு பார்க்கிறீர்கள்? (06:21)
வருங்காலத்தில் அஹ்மதி முஸ்லிம்களின் எண்ணிக்கை அதிகரிக்கும் போது இஸ்லாமிய பொருளாதாரக் கொள்கைகளைப் பின்பற்றுபவர்களின் எண்ணிக்கையும் கூடும் என்பதால், ஜமாஅத்தின் செலவுகளைச் சமாளிக்கவும், ஏழைகள், மாணவர்கள், நோயாளிகள் மற்றும் கைம்பெண்களுக்கு உதவவும் வஸிய்யத் திட்டத்தில் அதிக மக்கள் இணைய வேண்டும். ஹஸ்ரத் மஸீஹ் மவூத் (அலை) அவர்கள் 'அல்-வஸிய்யத்' நூலில் விளக்கியுள்ளபடி, இஸ்லாமிய போதனைகளைப் பரப்புவதுடன் சமூகத்தில் தேவையில் இருப்பவர்களுக்கு உதவி செய்வதே இத்திட்டத்தின் முக்கிய நோக்கமாகும். உலகம் முழுவதும் அஹ்மதி முஸ்லிம்களின் எண்ணிக்கை அதிகரிக்கும் போது இந்த வஸிய்யத் முறை தானாகவே விரிவடைந்து, தேவைப்படுபவர்களுக்கும் அநாதைகளுக்கும் ஆதரவளிக்கும் ஒரு வலுவான அமைப்பாக மாறுவதுடன், இது 'ஹுகூகுல்லாஹ்' (இறைவனின் உரிமை) மற்றும் 'ஹுகூகுல் இபாத்' (படைப்பினங்களின் உரிமை) ஆகிய இரண்டையும் நிறைவேற்ற உதவும் ஒரு சிறந்த வழியாகும்.
முரண்பட்ட தகவல்கள் இருக்கும்போது, நாம் எந்த மருத்துவ முறையைப் பின்பற்ற வேண்டும்? (08:22)
கொலஸ்ட்ரால் போன்ற உடல்நலப் பாதிப்புகள் குறித்து வெவ்வேறு மருத்துவ முறைகள் மாறுபட்ட கருத்துகளைக் கொண்டிருந்தாலும், உடலின் தேவையற்ற கொழுப்பைக் குறைக்க அனைத்து மருத்துவ முறைகளும் வலியுறுத்தும் உணவுக்கட்டுப்பாட்டையும் மருத்துவர் பரிந்துரைக்கும் கட்டுப்பாடுகளையும் கடைப்பிடிப்பது அவசியமாகும். கொலஸ்ட்ரால் அதிகரிப்பால் இதயக் குழாய்களில் அடைப்பு ஏற்படும் என்பது அறிவியல் பூர்வமான உண்மை என்பதால், இதய ஆரோக்கியத்தைப் பேண நவீன மருத்துவ முறைகளையும், காலத்தால் நிரூபிக்கப்பட்ட வழிகாட்டுதல்களையும் அலட்சியப்படுத்தக் கூடாது. உணவுக் கட்டுப்பாட்டுடன் தினமும் தகுந்த நடைப்பயிற்சி மேற்கொள்வது இதய ஆரோக்கியத்திற்கு மிகவும் முக்கியம் என்பது மட்டுமல்லாமல், இதய அடைப்புகளை நீக்கவும் ஆரோக்கியத்தைப் பேணவும் 'திப்பே-நபவி' (நபி ஸல் அவர்களின் மருத்துவ முறை) வழிகாட்டுதலின்படி 'அஜ்வா' பேரீச்சம்பழத்தின் முக்கியத்துவத்தைக் குறிப்பிட்டு, இத்தகைய வாழ்வியல் மாற்றங்களை முரண்பாடின்றிப் பின்பற்ற வேண்டும்.
ஒருவர் மரணத் தருவாயில் இருக்கும்போது, அவர்களின் நல்முடிவுக்காக நாம் பிரார்த்திக்கிறோம்; இதைப்பற்றி விளக்குங்கள். (11:43)
மனிதனின் மனம் எப்போது வேண்டுமானாலும் மாறலாம் மற்றும் எவ்வளவுதான் இறை நம்பிக்கையுடன் இருந்தாலும் திடீரென வழிதவறிச் செல்லும் அபாயம் உண்டு என்பதால், நல்ல முடிவுக்காக மரணத் தருவாயில் மட்டும் பிரார்த்தனை செய்யாமல் ஒவ்வொரு மனிதனும் தன் வாழ்நாள் முழுவதும் தனக்காகவும் நெருக்கமானவர்களுக்காகவும் தொடர்ந்து பிரார்த்திக்க வேண்டும். மரணத் தருவாயில் இருப்பவர்களின் மன அமைதிக்காகவும், அவர்கள் இறை நினைவில் இருக்கவும் 'சூரா யாசீன்' ஓதுவது வழக்கமாக உள்ள நிலையில், இறுதி நேரத்தில் மட்டும் நல்ல முடிவு கேட்டுப் பிரார்த்தனை செய்வதை வாழ்நாள் முழுவதும் தவறு செய்துவிட்டு கடைசியில் மன்னிப்பு கோருவதோடு ஒப்பிடக் கூடாது. ஏனெனில், நல்ல முடிவு என்பது இறுதி நேரத்துக்கானது மட்டுமல்ல, அது வாழ்நாள் முழுவதும் இறைவனின் பாதையில் நிலைத்திருப்பதற்கான ஒரு தொடர் முயற்சியாகும் என்று.
'வக்ஃப்-ஏ-நவ்' (Waqf-e-Nau) உறுப்பினர்கள் வகுப்புகளில் கலந்துகொள்வதன் முக்கியத்துவத்தை ஹுசூர் (aba) அவர்கள் வலியுறுத்துகிறார்கள் (15:09)
வக்ஃபே நவ் பிள்ளைகளுக்கு முறையான ஆன்மிகப் பயிற்சி (Deeni Tarbiyyat) கிடைப்பதை உறுதி செய்ய வேண்டும் என்றும், அவர்கள் வகுப்புகளுக்குத் தவறாமல் வருவதை ஊக்குவிக்க வேண்டும். வக்ஃபே நவ் என்பது வெறும் ஒரு பெயரோ பட்டமோ அல்ல, மாறாக அவர்கள் ஏன் இத்திட்டத்திற்காக அர்ப்பணிக்கப்பட்டுள்ளார்கள் என்ற நோக்கத்தை அவர்கள் அறிந்திருக்க வேண்டும். மற்ற பிள்ளைகளுக்கும் வக்ஃபே நவ் பிள்ளைகளுக்கும் இடையில் ஒரு தெளிவான வித்தியாசம் இருக்க வேண்டும்; அந்த வித்தியாசம் வெறும் பெயரில் மட்டுமில்லாமல் அவர்களின் தொழுகை முறைகள், குர்ஆன் ஓதும் தரம் மற்றும் மார்க்க அறிவைப் பெறுவதில் காட்டும் சிறப்பிலேயே வெளிப்பட வேண்டும். எனவே, உலகியல் கல்வியுடன் சேர்த்து மார்க்கக் கல்வியிலும் அவர்கள் சிறந்தவர்களாகத் திகழ வேண்டியது அவசியம்.
ஆன்மிக விஷயங்களில் கவனம் செலுத்துவதன் அவசியத்தை ஹுசூர் (அய்யதஹுல்லாஹ்...) வலியுறுத்துகிறார்கள். (15:49)
ஜமாஅத்தின் சார்பில் ஏழைகளுக்கு உணவு வழங்குவது போன்ற நற்பணிகள் பாராட்டத்தக்கவை என்றாலும், மக்களின் உடல் பசியைப் போக்குவது போல அவர்களின் ஆன்மிகப் பசியையும் போக்க முயற்சி செய்ய வேண்டும். மக்களுக்கு 'ஆன்மிக ரீதியிலான உணவை' வழங்க ஐவேளைத் தொழுகை மற்றும் ஜும்ஆத் தொழுகைகளில் வருகையை அதிகரிக்கச் செய்வதோடு, திருக்குர்ஆனை ஓதுவதற்கும் ஹஸ்ரத் மஸீஹ் மவ்ஊத் (அலை) அவர்களின் புத்தகங்கள் மற்றும் ஜமாஅத் இலக்கியங்களை வாசிப்பதற்கும் மக்களைத் தூண்ட வேண்டும். இதற்கு ஜமாஅத்தின் ஆமிலா உறுப்பினர்கள் தாங்களே தொழுகைகளில், குறிப்பாக ஃபஜ்ர் மற்றும் இஷா தொழுகைகளில் தவறாமல் கலந்துகொண்டு மற்றவர்களுக்கு முன்னுதாரணமாகத் திகழ வேண்டும்; சுருக்கமாகச் சொன்னால், சமூக சேவை ஒருபுறமிருக்க ஜமாஅத்தின் அடிப்படைப் பணியான ஆன்மிகத் தரத்தை உயர்த்துவதில் அதிகக் கவனம் செலுத்த வேண்டும்.
ஜமாஅத்தை விட்டு விலகி இருப்பவர்களுடன் நாம் எவ்வாறு உறவை வளர்த்துக்கொள்ளலாம்? (17:06)
ஜமாஅத்திலிருந்து தூரமாக இருக்கும் உறுப்பினர்கள் பதிலளிக்கவில்லை அல்லது அழைப்புகளை ஏற்கவில்லை என்றாலும் சோர்வடையாமல், 'துளித் துளியாகத் தான் பாறையையும் துளைக்க முடியும்' என்ற பழமொழிக்கேற்ப தொடர்ந்து அன்புடன் நலம் விசாரிக்க வேண்டும். அவ்வாறு நலம் விசாரிக்கும் போது ஜமாஅத் நிர்வாகம், சந்தா போன்ற அழுத்தமான விஷயங்களைப் பேசாமல், அவர்களின் வாழ்க்கைச் சூழலைப் பற்றி மட்டுமே நிபந்தனையற்ற அன்புடன் கேட்டுத் தெரிந்துகொள்ள வேண்டும். எப்போதாவது அவர்களின் வீட்டிற்கு அருகில் செல்லும்போது சும்மா ஒரு 'ஸலாம்' சொல்லிவிட்டுப் போகலாமா என்று அன்புடன் கேட்கலாம்; ஒருவேளை அவர்கள் வர வேண்டாம் என்று சொன்னால் அதற்காக அதிருப்தி கொள்ளாமல், குர்ஆனின் போதனைப்படி மகிழ்ச்சியுடனும் கண்ணியத்துடனும் திரும்பி வருவதே ஒரு முஃமினின் பண்பாகும் என்ற மனப்பக்குவத்தை வளர்த்துக்கொண்டால் அவர்களுடனான உறவு நிச்சயம் மேம்படும்.
'தப்லீக்' (மார்க்கப் பிரச்சாரம்) பணிக்காக விருந்தினர்களை மசூதிக்கு அழைக்கிறோம், ஆனால் எதிர்பார்த்த பலன் கிடைப்பதில்லை; எங்களுக்கு ஆலோசனை வழங்குங்கள். (19:49)
விருந்தினர்களை வற்புறுத்திப் பிரச்சாரம் செய்வதை விட, ஹஸ்ரத் நபி ஸல் மற்றும் ஹஸ்ரத் மஸீஹ் மவ்ஊத் (அலை) அவர்களின் வழியைப் பின்பற்றி உங்களின் சிறந்த நற்பண்புகள் (Akhlaq) மற்றும் அழகிய நடத்தையின் மூலமே அவர்களைக் கவர வேண்டும். மசூதிக்கு வருபவர்களைத் தப்லீக் என்ற பெயரில் நெருக்கடிக்கு உள்ளாக்காமல், அவர்கள் அன்பைப் பார்த்துத் தாங்களாகவே ஆர்வம் காட்டும் வரை பொறுமையாக இருக்க வேண்டும்; மாறாக உடனே வற்புறுத்தினால் அவர்கள் மீண்டும் வரத் தயங்குவார்கள். தேநீர் உபசரிப்பு மற்றும் நலம் விசாரிப்பு மூலம் விருந்தினர்களுடன் சுமூகமான நட்புறவை வளர்த்துக்கொண்டால் அவர்களே உண்மைகளைத் தெரிந்துகொள்ள ஆர்வம் காட்டுவர் என்பதால், அவர்கள் கேட்கும் கேள்விகளுக்கு அவர்களின் கல்வி மற்றும் அறிவு மட்டத்திற்கு ஏற்ப பொறுமையாகப் பதிலளிக்க வேண்டும். ஒரு நபர் உடனே இஸ்லாத்தைத் தழுவவில்லை என்றாலும் மனம் தளராமல், தப்லீக் என்பதை ஒரு தொடர் செயல்முறையாகக் கருதி, அவர்களுடன் நல்லுறவைப் பேணினால் காலப்போக்கில் அவர்களே சத்தியத்தின் பக்கம் வருவார்கள்.
பலமுறை திருமண வரன்கள் நிராகரிக்கப்பட்டதால், ஜமாஅத்திற்கு வெளியே திருமணம் செய்துகொள்ள விரும்பும் இளம் அஹ்மதி இளைஞர்களுக்கு நாம் எவ்வாறு ஆலோசனை வழங்கலாம்? (25:31)
வாழ்க்கைத்துணையைத் தேர்ந்தெடுப்பதில் நபிகளார் காட்டிய வழியின்படி 'தீன்தாரி' (மதப்பற்று) மட்டுமே மிக முக்கியமான அடிப்படையாக இருக்க வேண்டும் என்றும், திருமணப் பேச்சுகளில் தொடர்ந்து ஏற்படும் நிராகரிப்புகளுக்குப் பின்னால் இருக்கும் பொறாமை அல்லது தவறான பிரச்சாரங்கள் போன்ற உண்மையான மூலக் காரணங்களைக் கண்டறிந்து அவற்றைச் சரிசெய்ய வேண்டும் என்றும் வலியுறுத்தப்படுகிறது. இதில் ஜமாஅத்தின் ஆமிலா உறுப்பினர்கள் மிகுந்த பொறுப்புடன் செயல்பட்டு சரியான வழிகாட்டுதலை வழங்க வேண்டும்; ஏனெனில், 'தர்பிய்யத்' என்பது வெறும் தொழுகை, குர்ஆனுடன் நின்றுவிடாமல் இதுபோன்ற சமூக மற்றும் குடும்பச் சிக்கல்களைத் தீர்ப்பதையும் உள்ளடக்கியதாகும். எனவே, இளைஞர்களுக்குத் தேவையான முழுமையான ஆதரவை வழங்க தப்லீக், தர்பிய்யத் மற்றும் ரிஷ்தா நாத்தா ஆகிய துறைகள் ஒன்றிணைந்து செயல்பட வேண்டும்.
நிதி வசதி இல்லாததால் உயர்கல்வி வாய்ப்பை இழந்தவர்களுக்கு நாம் எவ்வாறு உதவலாம்? (27:07)
கல்வி கற்க நிதி தேவைப்படுபவர்களுக்கு ஜமாஅத் உதவ வேண்டும். தகுந்த வேலை கிடைக்குமா என்ற பயத்தில் கல்வியைக் கைவிடாமல் தொடர்ந்து முயல வேண்டும் என்றும், நல்ல வேலைக்காக இறைவனிடம் பிரார்த்திக்க வேண்டும். தற்போதைய உலகளாவிய பொருளாதார நெருக்கடியால் உயர் கல்வி பெற்றவர்களுக்கே தகுந்த வேலை கிடைப்பதில் சிரமம் உள்ளதால், தகுந்த வேலை கிடைக்கும் வரை சும்மா அமர்ந்திருக்காமல், கிடைக்கும் எந்தவொரு வேலையையும் செய்து சுயசார்புடன் (Independent) இருக்க வேண்டும். இக்காலக்கட்டத்தில் வேலைவாய்ப்புகள் கடினமாக இருந்தாலும், மக்கள் கல்வியைத் தொடர ஊக்கப்படுத்தப்பட வேண்டும் என்றும், எதிர்காலத்தில் சிறந்த வாய்ப்புகள் நிச்சயம் அமையும்.
அமெரிக்காவில் நீண்ட காலமாக வசிக்கும் குடும்பங்களுக்கும் புதிதாகக் குடியேறிய குடும்பங்களுக்கும் இடையே ஒரு சகோதரத்துவ முறையை நாம் தொடங்கலாமா? (29:21)
அமெரிக்காவிற்குப் புதிதாக குடியேறிய குடும்பங்களை ஏற்கனவே வசிக்கும் குடும்பங்களுடன் இணைக்கும் 'முஆகாத்' (சகோதரத்துவ) முறையை ஹுஸூர் வரவேற்று, இதனை ஒரு முன்மாதிரித் திட்டமாக பால்டிமோர் ஜமாஅத்தில் தொடங்கி செயல்படுத்துமாறு அறிவுறுத்தினார்கள். இத்திட்டத்தை 'தர்பிய்யத்' மற்றும் 'அமூர்-இ-ஆமா' ஆகிய துறைகள் ஒருங்கிணைந்து செயல்படுத்த வேண்டும். 'அமூர்-இ-ஆமா' துறையின் பணி வெறும் ஒழுங்கு நடவடிக்கையோடு நின்றுவிடாமல் ஜமாஅத் உறுப்பினர்கள் புதிய சூழலில் பொருளாதார மற்றும் சமூக ரீதியாக நிலைபெற உதவுவதும் ஆகும். மேலும், முஹாஜிரீன்களுக்கு அன்ஸாரிகள் உதவியது போல புதிய குடும்பங்கள் சுயசார்புடன் தங்களின் சொந்தக் கால்களில் நிற்கத் தேவையான வழிகாட்டுதல்களை வழங்க வேண்டும். அவசியமான நிதியுதவிகளை உள்ளூர் அல்லது தேசிய ஜமாஅத் அமைப்பின் மூலம் பெற்றுக் கொள்ளலாம்.
புதிதாகக் குடியேறிய குடும்பங்களின் தந்தையர்கள் நீண்ட நேரம் வீட்டை விட்டு வெளியே வேலை செய்வதால் குடும்பத்தின் 'தர்பிய்யத்' (ஆன்மீக மற்றும் ஒழுக்கப் பயிற்சி) பாதிக்கப்படுகிறது; இதை எவ்வாறு சரிசெய்யலாம்? (32:14)
தந்தை வேலைக்காக நீண்ட நாட்கள் வீட்டை விட்டு வெளியே இருக்கும்போது தாயார் மட்டும் குழந்தைகளைக் கவனிப்பது கடினமாவதுடன், அது குழந்தைகளின் வளர்ப்பு, ஒழுக்கம் மற்றும் ஆன்மிகப் பாதையைப் பாதிக்க வாய்ப்புள்ளது என்பதால், பணம் சம்பாதிப்பதோடு தீன் மற்றும் ஆன்மிக வளர்ப்பிலும் தந்தையர்கள் அதிக அக்கறை காட்ட வேண்டும். இதில் ஜமாஅத்தின் ஆமிலா உறுப்பினர்கள் தலையிட்டு, வேலைப்பளு அதிகம் உள்ள குடும்பங்களைக் கண்டறிந்து தகுந்த ஆலோசனைகளையும், சாத்தியமான இடங்களில் மாற்று வேலை வாய்ப்புக்கான வழிகாட்டுதல்களையும் வழங்க வேண்டும். மேலும், இக்குடும்பங்களை ஜமாஅத்தில் உள்ள மற்ற குடும்பங்களுடன் 'முஆகாத்' (சகோதரத்துவ) முறையில் இணைப்பதன் மூலம், ஒருவருக்கொருவர் துணையாக இருந்து குழந்தைகளின் வளர்ப்பிலும் ஆன்மிக வாழ்விலும் சமநிலையைப் பேண உதவ வேண்டும்.
சந்திப்பு நிறைவடைந்த பிறகு, கலந்து கொண்டவர்களுக்கு ஹுஸூர் அன்வர் (அய்யதஹுல்லாஹ்..) அவர்கள் அனைவருடனும் புகைப்படம் எடுத்துக் கொண்டதுடன் அனைவருக்கும் பேனாவை அன்பளிப்பாக வழங்கினார்கள். (34:07)
ஜும்ஆ (வெள்ளிக்கிழமை) பேருரையின் துணுக்கு, 19 ஜூன் 2026 - ஹஸ்ரத் நபி (ஸல்) அவர்களின் தாராள குணம். (34:26)
ஜூன் 19, 2026 அன்று நிகழ்த்தப்பட்ட ஜும்ஆ உரையில், ஹஸ்ரத் நபி (ஸல்) அவர்களின் தன்னலமற்ற தாராள மனப்பான்மையைக் குறிப்பிட்ட ஹுஸூர் (அய்யதஹுல்லாஹ்..) அவர்கள், ஒருமுறை ஒருவர் உதவி கேட்டபோது தன்னிடம் எதுவுமில்லாத நிலையிலும், "என் பெயரில் தேவையானதை வாங்கிக்கொள்ளுங்கள், நான் பின்னர் செலுத்துகிறேன்" என்று நபி (ஸல்) கூறியதை விளக்கினார். இதைக் கண்டு ஹஸ்ரத் உமர் (ரலி) அவர்கள், இல்லாத ஒன்றைக் கொடுக்க இறைவன் நிர்பந்திக்கவில்லை என்று கவலைப்பட்டபோது, வறுமைக்கு அஞ்சாமல் இறைவனின் அருளின் மீது முழு நம்பிக்கை வைத்து தாராளமாகச் செலவிடுமாறு ஓர் அன்சாரி தோழர் கூற, ஹஸ்ரத் நபி (ஸல்) அவர்கள் மகிழ்ச்சியுடன் புன்னகைத்தார்கள். இறுதியாக, பிறருக்கு வாரி வழங்குவதையேதான் இறைவன் தனக்குக் கட்டளையிட்டதாக ஹஸ்ரத் நபி (ஸல்) அவர்கள் குறிப்பிட்டார்கள் என்று இவ்வுரை விவரிக்கிறது.
Source: https://www.youtube.com/watch?v=N0htQlH96rM
கருத்துகள் இல்லை:
Love for All Hatred for None